وزیر اعظم عمران خان دا نیشنل کوآرڈینیشن کمیٹی ہاوسنگ، کنسٹرکشن اینڈ ڈویلپمنٹ دے ہفتہ وار اجلاس توں خطاب

تعمیرات دا شعبہ معیشت دے ودھارے دا ضامن اے ،ایں شعبے دے ودھنڑ نال بنکاں کیتے منافع بخش کاروبار دے موقع میسر آسن ،گھراں دی تعمیر دے حوالے نال درخواستاں کوں سوکھا بنڑایا ونجے تاں جو گھٹ آمدنی آلے وی فائدہ چاون، وزیر اعظم
اسلام آباد ۔ 19 اگست (اے پی پی) وزیر اعظم عمران خان بینکاں ولوں تعمیرات دے شعبے اچ متحرک کردار ادا کرنڑ دے عزم تے اطمینان دا اظہار کریندے ہوئیں آکھیے جو تعمیرات دا شعبہ معیشت دے ودھارے دا ضامن اے ، تعمیرات دے شعبے دے ودھارے نال بینکاں کیتے منافع بخش کاروبار دے بہوں سارے موقع ملسن ، گھراں دی تعمیر دے حوالے نال درخواستاں کوں سوکھا بنڑایا ونجے ، گھٹ تے درمیانی آمدنی آلے لوک وی ایں سہولت توں ودھ توں ودھ فائدہ چا سگن ۔وزیراعظم آفس توں جاری بیان موجب اے گال انہاں آپ دی صدارت وچ نیشنل کوآرڈینیشن کمیٹی برائے ہاوسنگ، کنسٹرکشن اینڈ ڈویلپمنٹ دے ہفتہ وار اجلاس نال خطاب کریندے ہوئیں آکھی اے ۔ اجلاس وچ وزیرِ اطلاعات سینیٹر شبلی فراز، معاونین خصوصی ملک امین اسلم، لیفٹنٹ جنرل(ر) عاصم سلیم باجوہ، سید ذوالفقار عباس بخاری، ڈاکٹر شہباز گل، گورنر اسٹیٹ بنک ڈاکٹر رضا باقر، چیئرمین نواں پاکستان ہاوسنگ اتھارٹی لیفٹنٹ جنرل(ر) انور علی حیدر تے بئے سینئر افسراں شرکت کیتی۔ اجلاس اچ ملک دے سارے وڈے بنکاں دے صدر تے نمائندگان وی شریک تھئے ۔اجلاس اچ شرکا کوں تعمیرات دے شعبے اچ بنکاں ولوں سوکھے قرضے تے رقم ڈیونڑ دے حوالے نال تھیونڑ آلی پیشرفت تے بریفنگ ڈتی۔ صدر پاکستان بینکس ایسوسی ایشن وزیر اعظم کوں بریف کریندے ہوئیں آکھیے جو حکومت ولوں تعمیرات دے ودھارے کیتے موافق پالیسیاں اتے بنکاں کیتے سہولت کاری توں نجی بنکاں دی حوصلہ افزائی تھئی اے ۔ سارے بنک تعمیرات دے ودھارے خصوصا گھٹ تے درمیانی آمدنی آلے لوکاں کوں گھر دی سہولت ڈیونڑ اچ اپنڑاں کردار ادا کرنڑ کیتے پرعزم ہوں ۔ صدر بنک آف پنجاب اتے صدر بنک الفلاح نیا پاکستان ہاﺅسنگ پروگرام دے تحت گھراں دی تعمیر دے ودھارے کیتے متعارف کرائے ونجنڑ آلے پراڈکٹس تے بریفنگ ڈتی۔ بئے بنکاں دے صدور وزیر اعظم کوں ڈسائے جو تعمیرات دے ودھارے دے حوالے نال بنکاں ولوں پراڈکٹس تیار کر گھدیاں گن جیرھیاں بہوں وختی متعارف کروائیاں ویسن ۔ وزیر اعظم بنکاں ولوں تعمیرات دے شعبے اچ متحرک کردار ادا کرنڑ دے عزم تے اطمینان دا اظہار کریندے ہوئیں آکھیے جو تعمیرات دا شعبہ معیشت دے ودھارے دا ضامن اے ۔ وزیراعظم آکھیے جو حکومت ولوں بنکاں دے سارے تحفظات کوں ہک پاسے کیتا گئے ۔ بنکاں ولوں ڈتے ونجنڑ آلے قرضے تے حکومت ولوں اعلان کیتے گئی سبسڈی دی وختی فراہمی کیتے سٹیٹ بنک کوں با اختیار بنڑا ڈتا گئے ۔ فورکلوژر قوانین دے معاملے دی موثر پیروی کیتی ویندی پئی اے ۔ وزیر اعظم عمران خان بینکاں کوں ہدایت کیتی جو گھراں دی تعمیر دے حوالے نال درخواستاں کوں سوکھا بنڑایا ونجے گھٹ آمدنی آلے لوک وی فائدہ چا سگن ۔