اسلام آباد ۔ 21 مارچ (اے پی پی) وزیر مملکت برائے داخلہ شہریار آفریدی آکھیے جو ریاست بلیک میل کائناں تھیسی ، قنون دی بالادستی تے کوئی سمجھوتہ کائناں کیتا ویسی،اتے قنون ہتھ اچ گھنڑ آلیاں دے خلاف سخت کارروائی کیتی ویسی ، ساری دنیا اساکوں ڈیکھدی پئی ہے،اساکوں مہذب بنڑ تے ڈکھاونڑ چاہیدے، کل اسلام آباد اچ جیرھا واقعہ تھیا،ایندے اچ 9 پولیس اہلکار زخمی تھئے، میڈیا دے کارکناں کوں وی ماریا گیا۔ خمیس کوں اتھاں پریس کانفرنس اچ انہاں آکھیا جو کہیں وی مہذب معاشرے اچ ملکی سلامتی اتے امن سانگے وزارت داخلہ دا کردار اہم حثیت رکھیندے، اختلاف رائے جمہوریت دا حسن ہوندے اتے ہر کہیں کوں احتجاج اتے اپنڑیں گالھ کرنڑ دا حق حاصل ہے، لیکن ایندا طریقہ کار ہوندے۔ انہاں آکھیا جو میں وی اپنڑیں سیاسی زندگی اچ ڈرون حملیاں، کرپشن اتے انتخابی اصلاحات سمیت اہم سیاسی تے ملکی معاملات تے سڑکاں تے احتجاج اتے لانگ مارچ کیتے لیکن قنون نافذ کرنڑ آلے اداریاں دی ہمیشہ عزت کیتی اتے کڈاہیں قنون دی نی تروڑیا ،لیکن گزریل ڈینھ جو کجھ تھیاا وہ ساریاں دے سامنڑے ہے اتے کیمراں ہر چیز ریکارڈ کر گھدی ہے۔ ا نہاںآکھیا جو جیرھا بندہ آئین تے قنون تروڑسی حکومت ایندے خلاف کارروائی کریسی ۔ انہاں آکھیا جو موجودہ وزیراعظم اتے حکومت دے ذمہ داران وی نیب اچ پیش تھئے، دلائل نال اپنڑیں بے گناہی ثابت کرنڑ چاہیدی ہے نہ جو لوکیں کوں جمع کرتے۔ انہاں آکھیا جو کل اساں برداشت کیتے، ہنڑ آئندہ جیرھا وی قنون تروڑسی اوندے نال قنون مطابق نبڑسوں۔ ہک سوال دے جواب اچ انہاں آکھیا جو گزریل ڈینھ اگراساں عوام کوں روکدے تاں کوئی بئی گالھ کیتی ویندی،اساں کہیں بندے کوں نی روکیا، سیاسی سرگرمیاں روکنڑ اساڈ ا کم کائنی، اساڈا کم تحفظ ڈیونڑہے، لیکن اگر پولیس اتے قنون نافذ کرنڑ آلے ادارایاں کوں ڈنڈے مارے ویسن تاں ایہ گالھ ٹھیک کائنی۔
وزیر مملکت داخلہ شہریار آفریدی دی پریس کانفرنس اچ گالھ مہاڑ
مضمون کا ماخذ : لاٹری کے سستے ٹکٹ
متعلقہ مضامین
